Tutduğu vəzifədən ayrılmağa hazırlaşan Roma papası XVI Benediktin bir gözünün kor olduğu iddia olunub. Bu barədə məlumatı almaniyalı jurnnalist Peter Sevald yayıb. Papa barədə yazdığı bioqrafiyanı başa çatdırmaq üçün 10 həftə əvvəl onunla görüşən Sevald “Corriere della Sera” qəzetindəki xəbərində ruhani liderin sol gözünün öz funksiyasını tamamilə itirdiyini yazıb.

“Axırıncı görüşümüz papanın sarayında baş tutub. Papanın vücudu sanki bir dəri, bir sümükdür. Dərziləri ona paltar çatdıra bilmirlər. Qulaqları yaxşı eşitmir və sol gözü tamamilə görmür. Gözümə daha sevimli, daha təvazökar və daha həssas göründü. Xəstə kimi deyildi, amma bədəni və ruhu çox yorğun görünürdü. Onu heç belə görməmişdim” – deyə Sevaldın xəbərində qeyd edilib.