Ermənistan prezidenti Serj Sarkisyanın Belçikaya bu günə planlaşdırılan səfəri Avropa səmasının vulkan külünə bürünməsi səbəbindən təxirə salınıb. Ermənistan prezidentinin mətbuat katibi Armen Arzumanyanın verdiyi məlumata görə, Serj Sarkisyanın Brüsselə səfəri başqa vaxt reallaşdırılacaq.

Qeyd edək ki, səfər zamanı Ermənistan prezidentinin Belçika və Avropa İttifaqı rəhbərlikləri ilə görüşləri planlaşdırılırdı.

Xatırladaq ki, İslandiya paytaxtı Reykyavikdən 200 km şimalda, Eyyafyallayöküll buzlağının yaxınlığında yerləşən vulkan mart ayında oyanmağa başlayıb. Vulkanda baş verən partlayış nəticəsində nəhəng kül buludu yaranıb. Kül buludu Avropanın əksər hava limanlarının fəaliyyətinin dayanmasına yol açıb. Minlərlə təyyarə reysi təxirə salınıb, sərnişinlər hava limanlarında qalmağa məcbur olublar.

Buzlağın altındakı vulkan IX əsrdən bu günə kimi 5 dəfə partlayıb. ANSPRESS