Gürcüstan prezidenti Mixail Saakaşvili ABŞ dövlət katibinin Pakistan və Əfqanıstan üzrə xüsusi nümayəndəsi Riçard Holbrukla vida mərasimində iştirak etmək məqsədilə Vaşinqtona səfər edib. Vida mərasimindən sonra Gürcüstan liderinin ABŞ prezidenti Barak Obama ilə əvvəlcədən elan olunmamış görüşü baş tutub.

“ABŞ prezidenti R. Holbrukla vida mərasimindən sonra Gürcüstan prezideti Mixail Saakaşvili ilə görüşüb. Söhbətə ABŞ-ın vitse-prezidenti Co Bayden də qatılıb”, deyə Ağ evin məlumatında bildirilib.

Obama Gürcüstan prezidentinə Vaşinqtona gələrək R. Holbrukla vida mərasiminə qatılması və ona ölümündən sonra Müqəddəs Georgi adına Qələbə ordeni verməsinə görə təşəkkür edib.

"Tərəflər Gürcüstanın gələcək iqtisadi inkişafı və ticarət həcmini artırması ilə bağlı səylərini, həmçinin Qafqazdakı problemləri və məğrur gürcü hərbçilərinin Amerika hərbi qulluqçuları ilə çiyin-çiyinə durduğu Əfqanıstanda sabitliyin qorunması üzrə beynəlxalq qüvvələrin (İSAF) fəaliyyətini müzakirə ediblər”, deyə Ağ evin məlumatında qeyd edilib. ANSPESS