Rusiya vətəndaşları ölkə prezidenti qismində Mixail Saakaşvili kimi adamı görmək istəyir. Hər halda “Exo Moskvı” radiosunun keçirdiyi sorğunun nəticələri belə deməyə əsas verir. İnternet vasitəsi ilə keçirilən sorğuda iştirak edən respondentlərin 60 faizi (1276 nəfər) “Rusiyada Mixail Saakaşvili kimi prezidentin olmasını istərdinizmi?” sualına müsbət cavab verib. Rəyi soruşulanların 35,7 faizi (750 nəfər) isə mənfi cavab verib. Yalnız 75 nəfər (3,6 faiz) suala cavab verməkdə çətinlik çəkib.

Telefon vasitəsi ilə keçirilən sorğunun nəticələri isə daha sensasiyalı olub. Belə ki, respondentlərin 78,9 faizi (926 nəfər) Rusiyada Saakaşvili kimi prezidentin olmasını istədiyini açıqlayıb. 21,1 faiz (248 nəfər) isə bunun əleyhinə çıxıb.

“Exo Moskvı” kimi mötəbər informasiya vasitəsinə inansaq, rusiyalıların əksəriyyəti Medvedev-Putin tandemindən “boğaza yığılıb”. Rusiya mətbuatında anti-Saakaşvili və anti-Gürcüstan təbliğatının aparıldığını nəzərə alsaq, sözügedən radionun keçirdiyi sorğunun nəticələrini gerçəkdən sensasiyalı kimi qəbul etmək olar. ANSPRESS