Naməlum şəxs Vatikanda Milad bayramı ibadətindən əvvəl Roma papası XVI Benediktin üstünə atılıb. Nəticədə Roma papası yıxılıb. Bu barədə xəbəri ibadəti canlı yayınlayan İtaliyanın RAİ telekanalı yayıb. Baş vermiş insidentə baxmayaraq, Roma papası XVI Benedikt sakit görünür və messa planlaşdırıldığı kimi yerli vaxtla saat 22.00-də (Bakı vaxtı ilə saat 01.00) başlayıb.

İlkin məlumatlara göorə, hadisə Roma papası XVI Benedikt Roma katolik kilsəsinin baş məbədinə daxil olarkən baş verib. Naməlum şəxs çəpəri aşaraq, Roma papasının üstünə atılmaq istəyib. Yaranmış qarışıqlıqda 82 yaşlı Roma papası XVI Benedikt ayaq üstdə dayana bilməyib və yıxılıb. Ona yerdən qalxmağa kömək ediblər və məbədə daxil olub. Papanın yanındakı 87 yaşlı Fransa kuriya kardinalı Roje Eçeqaray isə ciddi zərbə alıb və özünü pis hiss edib. RAİ telekanalında insidentin videogörüntülərinin olduğu bildirilir.

Şahidlərin sözlərinə görə, hadisəni qadın törədib və saxlanılıb. Onun psixi sarsıntılardan əziyyət çəkdiyi güman edilir. ANSPRESS