APA-nın “İnterfaks”a istinadən verdiyi məlumata görə, artıq bülletenlərin 60%-i sayılıb. Yeni Konstitusiyaya əsasən, Qırğızıstan prezident respublikasından parlament respublikasına çevrilib.

Bundan başqa, müvəqqəti hökumətin başçısı Roza Otunbayeva respublikanın qanuni prezidenti elan olunması üçün lazımi qədər səs toplayıb. Onu səsvermədə iştirak edən 1,9 milyon nəfərin yarısından çoxu dəstəkləyib.

Bülletenlərin hələ 40%-nin hesablanmamasına baxmayaraq, referenduma çıxarılmış üç məsələdən ikisinin nəticəsi artıq məlumdur.

Qeyd edək ki, referenduma bu məsələlər çıxarılıb: R. Otunbayevanın prezident səlahiyyətlərinin müddətinin 31 dekabr 2011-ci ilədək uzadılması; Konstitusiyaya dəyişiklik və Konstitusiya Məhkəməsinin ləğv edilməsi.

Səsvermədə seçicilərin 67,5%-i iştirak edib. APA