Pakistanda “Hakkani” terror qruplaşmasının liderlərindən biri Canbaz Zadran məhv edilib. Məlumatı “Accociated Press” agentliyi ABŞ hökumətindəki mənbəyə istinadən yayıb. Məlumata görə, ekstremist lider Pakistanın şimal-qərbindəki Miranşah şəhərində öldürülüb. Canbaz Zadran pilotsuz uçan aparatın hücumu nəticəsində zərərsizləşdirilib.

“Accociated Press” agentliyi iddia edir ki, Canbaz Zadran Kabildə və Əfqanıstanın cənub-qərbində terror hücumları seriyasının təşkilatçısı olub. O, “Hakkani” terror qruplaşmasının başçılarından olan Bədarəddin Hakkanin sağ əli sayılır.

ABŞ xüsusi xidmət orqanları “Hakkani” qruplaşmasını ən təhlükəli terror təşkilatlarından hesab edir. Qruplaşma Əfqanıstanda çoxsaylı terror aktlarının təşkilatçısıdır.

Vaşinqton Pakistan kəşfiyyatını (İSİ) “Hakkani” qruplaşması ilə əlaqədə ittiham edib. İslamabad və terror təşkilatının nümayəndələri isə bu barədə iddiaları rədd edirlər. ANSPRESS