Tanınmış hind aktyoru Şahrux Xan özünü Hindistanda təhlükəsizlikdə hiss edir. Bollivud ulduzu bunu Hindistanın Mumbay şəhərində "Times of India" film mükafatının təqdimetmə mərasiminin açılışında deyib. Çıxışı zamanı Şahrux Xan bu yaxınlarda bir ingilisdilli jurnal üçün yazdığı məqaləsinin düzgün anlaşılmadığını deyib.

"Yazdığım bu məqalədə onu göstərmək istəmişdim ki, mən Hindistanda müsəlman aktyor olaraq, bir sıra dar düşüncəli və dini ideologiyanı hər şeyə qatan insanlar tərəfindən ikimənalı və yanlış anlaşılıram" - aktyor belə deyib.

Qeyd edək ki, Şahrux Xanın məqaləsinə ilk reaksiyanın Pakistanın daxili işlər naziri Rəhman Malik verib və Hindistanın müsəlman olan Şahrux Xanın təhlükəsizliyini qorumalı olduğunu deyib. 47 yaşlı aktyor isə bildirir ki, insanlar hətta onun məqaləsini oxumamış buna reaksiya verirlər.

"Mənə bu cür yersiz məsləhətlər verən insanlara demək istəyirəm ki, Hindistanda çox xoşbəxtəm və təhlükəsizlikdəyəm. Bizim demokratik, azad və müstəqil həyat tərzimiz var." - sitatın sonu.

Qeyd edək ki, Şahrux Xan açılışını etdiyi "Times of India" film mükafatının təqdimetmə mərasimində fəxri qonaq və münsiflər heyətinin üzvü kimi çıxış edəcək.