Amerikanın ABC telekanalı dekabrın 25-də 23 yaşlı Nigeriya vətəndaşı Ömər Fərrux Əbdül Mütəlləbin “Delta-Northwest” şirkətinə məxsus təyyarədə işə salmalı olduğu partlayıcı qurğunun fotolarını nümayiş etdirib. Fotolardan görünür ki, uğursuz terrorçu bombanı alt paltarında gizlədib. İndiyədək terror cəhdi ilə bağlı bu cür aşkar sübutlar nümayiş olunmamışdı.

Ömər Fərrux Əbdül Mütəlləbin alt paltarında pentaeritrittetranitrat adlanan partlayıcı maddə ilə doldurulmuş kisə gizlədilib. Amerikalı hərbçilərin sınaqları göstərib ki, bu maddənin 50 qramı təyyarədə deşik açılması üçün kifayətdir. Əgər Ömər Fərrux Əbdül Mütəlləb istəyinə çatsaydı, bu terror aktı çox ciddi nəticələr verə bilərmiş. O, detonator əvəzinə turşu ilə doldurulmuş şprisdən istifadə edib. Hüquq-mühafizə orqanları hesab edirlər ki, məhz bu detal terrorçunun əməlinin zəif nöqtəsi olub. Çünki 23 yaşlı gənc bombanı işə salarkən turşu partlayıcı maddəyə çatmayıb və partlayış baş verməyib, yalnız alov çıxıb. ANSPRESS