Türkiyədə din xadimləri azanın Allahın dəvəti olduğunu xatırlatmaq üçün yerli sakinlərə dəvətnamə paylayaraq onları məscidə namaz qılmağa dəvət edib. “İhlas” (İHA) agentliyinin məlumatına görə, bu, Zonquldak vilayətinin Alaplı rayonunda baş verib. Qeyd edək ki, müftilik əməkdaşları bu məqsədlə rayonda olan bütün ticari obyektləri dolaşaraq hər kəsə dəvətnamə veriblər.

“Xalqımızı xüsusilə sübh namazında məscidə dəvət etmək üçün bu dəvətnamələri hazırladıq. Bu dəvətnamənin məqsədi insanlara azanın Allahın dəvəti olduğunu xatırlatmaqdır. Yəni minarədən oxunan hər azanla Allah bizi xüsusi olaraq namaza dəvət edir” – deyə rayon müftisinin müavini Osman Fateh Eryiğit bildirib.

Qeyd edək ki, belə bir aksiyanı müsbət qarşılayan bir çox yerli sakin isə bu dəvətnamələri xatirə kimi saxlayacaqlarını deyiblər.