Rusiyadan Fransaya yola düşən sərnişin qatarı 37 saatlıq kontinental səfərdən sonra mənzil başına çatıb. Bununla da, son 20 ildə ilk dəfə Moskvanı birbaşa olaraq Berlin və Paris şəhərləri ilə birləşdirən yeni dəmiryol xəttinin açılışı edilib. Rusiya Dəmiryol Şirkətinə məxsus qatar Moskvadan bazar ertəsi səhər yola düşüb və Parisə dünən axşam çatıb. Jar de-Lyest vağzalına çatan sərnişinlər rəqqaslar və şampan şərabı ilə qarşılanıb. Qatar saatda 200 kilometr sürətlə hərəkət edərək, 3177 kilometr məsafə qət edib.
Qış aylarında analoji marşrutla həftədə 3 səfər, yayda isə həftədə 5 səfər həyata keçiriləcək.