“Rusiyanın baş naziri Vladimir Putinin Ukrayna və Gürcüstan prezidentlərinin ünvanına zarafatları Ukraynanı təhqir etməkdir”. Bunu Gürcüstan prezidenti Mixail Saakaşvili televiziya ilə çıxışında bildirib: “Putin söz vermişdi ki, məni bədənimizin hansısa hissələrindən asacaq. İndi qalstukumdan danışır. Burada bir yaxşı xəbər var ki, o bir qədər yuxarı-qalstuka qədər qalxıb. Mən belə özümü sakit hiss edirəm”.
Mixail Saakaşvili bəyan edib ki, Ukrayna və Gürcüstan Avropaya doğru, Avropanın inkişaf yolu ilə gedirlər: “Onlar isə bizi Sovet İttifaqına qaytarmaq istəyirlər. Mən Sovet İttifaqını istəmirəm, mənim xalqım da bir daha Sovet İttifaqına qayıtmaq istəmir”.
Xatırladaq ki, Rusiyanın baş naziri Vladimip Putin Yaltada keçirdiyi mətbuat konfransında Gürcüstan prezidentini ibarəli ifadələrlə lağa qoymuşdu. ANSPRESS