Mayın 19-da Belarus paytaxtında Müstəqil Dövlətlər Birliyi Hökumət Başçıları Şurasının 57-ci iclası keçiriləcək. MDB-nin Minskdəki İcraiyyə Komitəsində AzərTAc-a bildiriblər ki, iclasın gündəliyinin layihəsinə 19 məsələ daxil edilmişdir. Əsas mövzu MDB üzvü olan dövlətlərin iqtisadi sahədə əməkdaşlığı məsələsi olacaq. İclasda Sərbəst Ticarət Zonası haqqında müqavilə imzalanması, MDB üzvü olan dövlətlərin 2020-ci ilə qədər olan dövr üçün Dövlətlərarası İnnovasiyalı Əməkdaşlıq Proqramının ilkin layihəsi müzakirə olunacaq.

Mədəniyyət, təhsil və elm sahələrində unikal inteqrasiya potensialından istifadə edilməklə, humanist dəyərlər və mədəni irs əsasında mədəniyyətlərarası dialoq sahəsində humanitar əməkdaşlıq istiqamətləri də böyük əhəmiyyət kəsb edir. İclasın gündəliyinin layihəsində təhlükəsizlik, o cümlədən ərzaq təhlükəsizliyi, MDB-də sahəvi əməkdaşlıq orqanlarının yaradılması, əvvəllər qəbul edilmiş sənədlərə dəyişikliklər edilməsi, qarşılıqlı fəaliyyətin digər istiqamətləri də nəzərdə tutulub.

Bir çox məsələlər MDB-nin gələcək inkişaf konsepsiyasının reallaşdırılması, Müstəqil Dövlətlər Birliyinin 20 illiyinə hazırlıq, Tacikistan Respublikasının Müstəqil Dövlətlər Birliyində sədrlik konsepsiyası üzrə əsas tədbirlər planında nəzərdə tutulub.