Amerikanın Federal Təhqiqatlar Bürosu ötən il dünyasını dəyişmiş amerikalı müğənni Uitni Hyuston haqqında sirlərlə dolu, 128 səhifəlik dosye dərc edib. Dosyeyə əsasən, tanınmış müğənni dəfələrlə şantaj və hədə-qorxu hədəfi olub. Kənar təhdidlər 1988-ci ildən 1999-cu ilə kimi davam edib.

Bütün bu illər ərzində müğənni elə çəkildiyi “Cangüdən” filmində olduğu kimi, manyaklaşmış fanatlarından dəhşət dolu məktublar alıb. Ən maraqlısı odur ki, hədə-qorxu hesabına varlanmaq istəyən insanlardan biri elə müğənninin ən yaxın rəfiqələrindən biri olub.

2009-cu ildə ən çox mükafat almış qadın olaraq, adı Ginessin Rekordlar kitabına düşmüş Hyustonun ölüm səbəbi hələlik məlum deyil. Polis cinayət izləri aşkar etməsə də, müstəqil təhqiqat aparan xəfiyyə, müğənninin narkotik dəllalları tərəfindən qətlə yetirildiyini iddia edir.