APA-nın “Kaleme”yə istinadən verdiyi məlumata görə, Mehdi Kərrubi İranın Milli Günü münasibətilə keçirilən mitinqlərdə iştirak etdikləri üçün xalqa təşəkkür edib. O bildirib ki, bəzi məmurların və təhlükəsizlik orqanlarının sıxıntı yaratmasına baxmayaraq, ölkənin ictimai-siyasi qüvvələri bu günü əzəmətli şəkildə qeyd ediblər. Amma buna baxmayaraq, hakimiyyətin ixtiyarında olan kütləvi informasiya vasitələri xalqın bu birliyini öz mənafeləri baxımından şərh edərək bunu öz uğurları kimi qələmə veriblər. M. Kərrubi ölkə Konstitusiyasının 59-cu maddəsinə əsasən referendum keçirməyi təklif edib: “Onda məlum olacaq ki, camaat kimin tərəfindədir. Mən bəyan edirəm ki, bu mitinqdə iştirak edənlər islahat tərəfdarları idi”. APA