ABŞ Birləşmiş qərargah rəisləri komitəsinin sədri Mayk Mallen bildirib ki, NATO koalisiya qüvvələrinin Liviya prezidenti Müammar Qəddafiyə sadiq olan ordunun aviazərbələr endirməsi, onların döyüş potensialını 30-40 faiz aşağı salıb.

Hərbiçi Bağdadda yerləşən Amerika hərbi bazasını baş çəkərkən Liviyadakı vəziyyəti də qiymətləndirib. O bildirib ki, Liviyadakı ümumi vəziyyət “pat” vəziyyətinə doğru irəliləyir. Bu isə o deməkdir ki, təfəflərdən heç biri vəziyyətin gedişatını öz xeyrinə doğru dəyişə bilmir.

M. Mallen etiraf edib ki, Liviyadakı gərgin vəziyyətdən radikal qruplar istifadə edə bilər. Amma o məlumat verib ki, hələki Liviya müxalifətinin ordu sıralarında “Əl-Qaidə” silahlılarının olması faktı aşkarlanmayıb.

“Biz buna olduqca böyük diqqət ayırırıq. Çünki bu məsələnin ciddiliyini anlayırıq. Amma bununla belə, hələki orada “Əl-Qaidə”nin olduğunu görmürük”, deyə ABŞ qərargah rəisi bildirib.

Qeyd edək ki, ötən ay NATO nümayəndəsi deyib ki, ABŞ kəşfiyyatı nümayişçilərin içində “Əl-Qaidə” üzvlərinin “işartı”ların olduğu müşahidə olunub. ANSPRESS