Litva Respublikasının sabiq prezidenti Algirdas Brazauskas uzun sürən xəstəlikdən sonra iyunun 26-da öz evində vəfat edib. Algirdas Brazauskas 1932-ci il sentyabrın 22-də anadan olub. İxtisasca hidrotexnika mühəndisi olan sabiq prezident inşaat sahəsində işləmiş, tikinti materialları sənayesi naziri olub, 1967-1977-ci illərdə Litva Dövlət Plan Komitəsi sədrinin müavini vəzifəsini tutub. 1977-1987-ci illərdə Litva Kommunist Partiyası Mərkəzi Komitəsinin katibi, 1988-1989-cu illərdə isə birinci katibi vəzifələrində çalışıb. Sonuncu vəzifədə Litva Kommunist Partiyasının Sov. İKP-dən ayrılaraq, Litva Demokratik Əmək Partiyasına çevrilməsinin təşəbbüskarı olub.

1992-ci ildə Seymin sədri seçilmiş, bir il sonra Litva Respublikasının birinci prezidenti olub. A.Brazauskas 1998-ci ilin prezident seçkilərində ikinci müddətə namizədliyini irəli sürməyib.

2001-ci ildə Litvanın baş naziri vəzifəsinə təyin edilən A.Brazauskas 2006-cı ilin yayınadək həmin vəzifədə çalışıb. ANSPRESS