Aprelin 17-də T.Şevçenko adına Ukrayna Milli Akademik Opera və Balet Teatrının səhnəsində görkəmli Azərbaycan bəstəkarı Arif Məlikovun “Məhəbbət əfsanəsi” baleti göstərilib. Dünya balet sənətinin ən gözəl nümunələrindən biri olan bu əsərin tamaşasına Kiyevdə akkreditə edilmiş diplomatik korpusun, Ukraynanın bütün hakimiyyət şaxələrinin, ölkənin yaradıcı elitasının, Azərbaycan diasporunun nümayəndələri və başqaları gəlmişdilər.

Tamaşa başa çatandan sonra qədirbilən tamaşaçılar ayağa qalxaraq “bravo”, “bravissimo” sədaları ilə bəstəkarı, dirijoru, musiqiçiləri və artistləri alqışlayıblar. Sonda Azərbaycanın Ukraynadakı səfiri Eynulla Mədətli Azərbaycan bəstəkarının bu gözəl baletinin ukraynalı sənətsevərlərə yüksək peşəkar səviyyədə çatdırılmasına görə teatrın baş direktoru Pyotr Çuprinə, quruluşçu-dirijor, Ukraynanın Xalq Artisti Aleksey Baklana, məşqçi-baletmeyster, Ukraynanın xalq artisti Eleonora Steblyaka, dirijor, Ukraynanın əməkdar incəsənət xadimi German Makarenko və başqalarına səmimi təşəkkürünü bildirib.

Qeyd edək ki, “Məhəbbət əfsanəsi” baleti T.Şevçenko adına dünya şöhrətli Ukrayna Milli Akademik Opera və Balet Teatrının repertuarına daxil edilib. ANSPRESS