Braziliyanın Rio-de-Janeyro şəhərində hər il keçirilən məşhur karnaval start götürüb. ANS PRESS-in Rusiya mətbuatına istinadən verdiyi xəbərə görə, şəhər meri rəsmi olaraq şəhərin açarlarını karnavalın monarxına - Kral Moma verib.

İki şahzadə ilə birlikdə açarı təhvil alan Kral Momo “şəhəri idarə etmək böyük məsuliyyət və şən işdir” deyərək samba rəqsi edib. Şən və kök biri olan kral şəhəri karnaval dövrünün xüsusi qanunları ilə idarə edir. Onun yeganə fərmanı hamının bir nəfər kimi əylənməsi barədə olur.

Karnavalın əsas hadisəsi sambadromda keçiriləcək samba məktəblərinin paradıdır.

Qeyd edək ki, karnaval 5 gün davam edəcək. Karnavala iştirak etmək üçün minlərlə turistin Braziliyaya gələcəyi gözlənilir. Festivalda təhlükəsizliyi 50 min polis qoruyacaq.