Qırğızıstanlı deputatlar Rusiyanın qalmaqallı siyasətçisi, Rusiya Liberal Demokrat Partiyasının (LDPR ) lideri Vladimir Jirinovskini persona non qrata elan ediblər.

ANS PRESS-in Rusiya mətbuatına istinadən verdiyi məlumata görə, deputatların Jirinovskinin Qırğızıstanın yığılan borcların əvəzinə İssık-Kul gölünün Rusiyaya verilməsi təklifi xoşuna gəlməyib.

Xatırladaq ki, bir müddət öncə Rusiya prezidenti Vladimir Putin Qırğızıstanın yarım milyard dollar borcunu bağışlamışdı. Keçən ilin oktyabr ayında isə Rusiya Afrikanın 20 milyard dollar borcundan keçmişdi. Bundan başqa, Rusiya yoxsul ölkələr üçün Dünya Bankının hesabına 50 milyon dollar köçürüb.