“Mənə azərbaycanlı kadrlar lazımdır. Hələ də axtarışdayam. Mən nəinki müşavir, eyni zamanda nazir vəzifəsinə azərbaycanlının təyin olunmasını istəyirəm. Mənə Əliyeva soyadlı maraqlı bir qızın adını çəkiblər”. APA-nın Gürcüstan bürosunun məlumatına görə, bu sözləri mayın 8-də Rustavidə Heydər Əliyev adına parkın açılışından sonra Gürcüstanın baş naziri Bidzina İvanişvili bildirib. “Bütün bunlara bir daha baxacağıq. Mən istəyirəm ki, azərbaycanlılara daha böyük vəzifə verim, müşavir kiçik vəzifədir”.

Baş nazir Bidzina İvanişvili qazın ölkəsinə satış qiymətinə görə, Azərbaycana təşəkkürünü bildirib. “Öncə Azərbaycana minnətdarlığımı bildirirəm. Gürcüstan əhalisi Azərbaycandan güzəştli qiymətlə alınan qazdan istifadə edir. Mən buna görə şəxsən İlham Əliyevə minnətdarlığımı bildirirəm”.

Gürcüstanın energetika naziri Kaxa Kaladze isə Rusiyadan elektrik enerjisi aldıqlarını deyib: “Nə üçün Rusiyadan qaz da almayaq? İndiki qiymətlərlə Rusiyadan qaz ala bilmərik. Amma Rusiya ilə ticarət münasibətlərimizi möhkəmləndirməli, dərinləşdirməliyik”.