İsrailin Hərbi Hava Qüvvələri bu gün səhər HƏMAS silahlı qruplaşmasının liderlərinin Qəzza bölgəsindəki iqamətgahını bombalayıblar.

ANS PRESS-in məlumatına görə, "Sky News" yerli sakinlərə istinad edərək xəbər verir ki, bu yaxınlarda Misirin baş naziri Hişama Kandilyanın qonaq olduğu HƏMAS-ın binası ciddi zədələnib: "Bina demək olar ki, dağılıb".

Kanalın yaydığı şəkillər və video kadrlarından aydın görünür ki, İsrailin atdığı raketlərdən sonra güclü alov ətrafa yayılıb.

Xatırladaq ki, İsrail Qəzza zolağında geniş miqyaslı hava əməliyyatına noyabrın 14-dən başlayıb. 300-ə yaxın aviozərbə nəticəsində HƏMAS-ın hərbi qanadının liderlərindən biri Əhməd Cabari ilə yanaşı 19 fələstinli öldürülüb. Onlardan 12-si mülki şəxsdir.