2002-ci ildən kütləvi ixtisarlara başlanılan “France Telecom”un 100 mini Fransada olmaqla 187 min işçisi var. Son vaxtlar şirkətin iş yerini itirmək qorxusu ilə bir-birinin ardınca intihar edən əməkdaşlarının sayı 23-ə çatıb.
Maraqlıdır ki, bu fakt yalnız sonuncu intihardan – 32 yaşlı Stefaninin özünü ofis binasının 4-cü mərtəbəsindən atmasından sonra ortaya çıxıb. Stefani atasının elektron poçtuna yazdığı ölümqabağı məktubunda intihara hazırlaşdığını, bununla da “France Telecom”un intihar edən 23-cü əməkdaşı olacağını bildirib. O, intihar etməsinə səbəb kimi şirkətdə aparılan restrukturizasiya proseslərini qəbul etməməsini göstərib. Həmkarlar təşkilatları isə iddia edir ki, restrukturizasiya ilə əlaqədar “France Telecom”da iş şərtləri süni şəkildə çətinləşdirilir, bununla da əməkdaşlar işdən könüllü şəkildə getməyə məcbur edilir.
Artıq Fransanın əmək naziri Xavier Darcos məsələ ilə bağlı “France Telecom”un prezidenti Didier Lombard ilə görüşüb və kütləvi intiharlarla bağlı araşdırma aparılmasını tələb edib.
Bu arada Fransanın Trua şəhərində şirkətin 49 yaşlı texniki işçisi daha aşağı vəzifəyə keçirilməsi səbəbindən özünü bıçaqlayaraq intihara cəhd edib. Hadisə iş yerində baş verib. Bu olaydan sonra mobil operatorun insan ehtiyatları direktoru Olivier Barberot zəif psixologiyaya malik əməkdaşların nəzarət altına alınacağını bildirib.APA