Ermənistan hökuməti psixiatriya dispanserlərinə ayrılan ərzaq və geyim həcmini artırmaq barədə qərar qəbul edib. Yerli KİV-in məlumatına görə, ötən gün hökumətin iclası keçirilib.

Rəsmi statistikaya görə, Ermənistanda müxtəlif psixiatrik problemlərdən əziyyət çəkən 45 min xəstə var. Ruhi xəstələrə fəaliyyətdə olan 8 dispanser xidmət edir. Lakin ictimaiyyət arasında bu xəstəxanaların reytinqi çox aşağıdır və yalnız müstəsna hallarda xəstələr psixiatriya dispanserlərinə yerləşdirilir.

Ermənistanın 2011-ci ilin dövlət büdcəsində xəstələrin bir günlük qidalanmasına 2,3 dollar, geyim, yataq və sanitar-gigiyena ləvazimatlarına isə 0,94 dollar xərclənir. Səhiyyə Nazirliyi isə günləlik qida normasının iki dəfə artırılmasını və 4,6 dollara çatdırılmasını təklif edir. Bunun üçün hökumət əlavə 900 min dollar ayırmalıdır.