“Türk Hava Yolları” (THY) şirkətinin reklam çarxlarında yer almaq üçün bu şirkətlə müqavilə imzalayan amerikalı basketbol ulduzu Kobi Brayanta qarşı ermənilərin etirazı davam edir. Ermənilərə məxsus “Asbarez.com”un yaydığı məlumata görə, Milli Basketbol Assosiasiyasının (MBA) müntəzəm çempionatı çərçivəsində “Toronto Raptors” – “Los-Anceles Leykers” matçı üçün Kanadaya gedən Brayant bu ölkədə də ermənilərin etiraz aksiyası ilə qarşılaşıb.

Kobi Brayantı “THY” ilə imzaladığı müqavilədən imtina etməyə çağıran ermənilər aksiya zamanı “Kobi doğru olanı et”, “Əxlaq bitdi” yazıları əks edilmiş sloqan və plakatlar tutublar. Kanadadakı aksiyanın Erməni Gənclik Federasiyası tərəfindən təşkil edildiyi bildirilir.

“Asbarez.com” agentliyinin məlumatına görə, Kobi Brayant artıq ermənilərin aksiyasından narahat olmağa başlayıb. Ermənistan saytının iddiasına görə, aksiyalardan sonra Kobi Brayant Türkiyənin tarixi keçmişindən xəbərsiz olduğunu vurğulayıb.

Xatırladaq ki, Kobi Brayanta qarşı ermənilərin etiraz aksiyaları ilk olaraq ABŞ-da başlamışdı.