Ermənistandakı uşaq bağçaları və məktəblərdə qriplə bağlı elan edilmiş ikihəftəlik karantin ilin sonunadək uzadılıb. Bu barədə qərarı ölkənin elm və təhsil naziri Armen Aşotyan qəbul edib.

Səhiyyə naziri Arutyun Kuşkanyanın tövsiyyəsini nəzərə alan təhsil naziri karantinin dekabrın 28-dək uzatmaq qərarına gəlib. Qərardan əvvəl iki nazirlik arasında epidemioloji vəziyyətlə bağlı məsləhətləşmələr aparılıb.
Elm və təhsil nazirinin imzaladığı əmrə əsasən, ölkədəki məktəbəqədər müəssisələrdə və ümumtəhsil məktəblərinin fəaliyyəti dekabrın 21-dən 28-dək dayandırılır. Ümumtəhsil məktəblərdə birinci yarım il üçün qiymətləndirmə prosesi yanvarda yekunlaşdırılacaq.

Xatırladaq ki, qrip epidemiyası üzündən Ermənistanda dərslər dekabrın 8-dən 19-dək təxirə salınmışdı. ANSPRESS