Səudiyyə Ərəbistanı qadınları avtomobildən istifadə qadağasına etiraz etmək üçün bu gün ölkədə aksiya keçirəcək. Aksiyaçılar ölkədə qadınların avtomobildən istifadə etməsini qadağan edən qanunu pozaraq maşın sürəcək. Ərəb qadınlar bu məqsədlə sosial şəbəkə saytı “Facebook”da hesab açaraq bu səhifədə təşkilatlanıblar.

Qeyd edək ki, Səudiyyə Ərəbistanında qadınların avtomobildən istifadə etməsi qadağandır. Aksiyanın təşkilatçıları isə ölkədə qadınların maşın sürməsi üçün qanuni hər hansı bir məhdudiyyət olmadığını, bu qadağanın mənbəyinin bir fətva olduğunu iddia ediblər. Qadınlar həmçinin bu qadağa ləğv olunana qədər aksiyalara davam edəcəklərini bildiriblər.

“Facebook”da “Women2drive - Manal and Bertha - Woman2drive - 17 June Saudi Arabia” adıyla açılmış səhifənin artıq 1 500-ə yaxın dəstəkləyicisi var.

Xatırladaq ki, Səudiyyə Ərəbistanında bu qadağanın mənbəyi kimi İslam şəriət qaydaları göstərilsə də bir çox İslam dövlətində qadınların avtomobil sürməsinə hər hansı bir məhdudiyyət qoyulmayıb. ANSPRESS