ANS Press Nəşriyyat Evinin uşaqlar üçün çap məhsulu olan "Elli" jurnalının may nömrəsi artıq satışdadır. ANS PRESS-in məlumatına görə, jurnalın bu buraxılşı olduqca maraqlıdır.

Qarşıdan böyük bayram gəlir - 28 may! Yeniyetmə oxucularını müstəqilliyə, əxlaqa, savada çağıran "Elli" jurnalı ilk səhifəsində bu tarixi günün əhəmiyyətini anlatmağa çalışır. Bir dövlət və bir insan üçün müstəqil olmaq nə deməkdir? Bunun dəyəri, məsuliyyəti nədir?

Yeni nömrədə "Elli"nin oxucularla birgə yazdığı "Sehrli tunel" komiksinin davamını oxuyaca bilərsiniz. Xatırladaq ki, "oyun" kimi düşünülən bu komiks həm yaradıcı fantaziya, həm də məntiqi düşüncə tələb edir. Belə ki, hər dəfə süjetin maraqlı məqamında, bir bölüm sona çatarkən yeni bir məntiqi tapşırığı yerinə yetirmək lazım gəlir. Və bu oxucuları maraqlı macəranın iştirakçısına çevirir.

"Elli" yeni sayında uşaqları kosmosa səyahətə dəvət edir. İlk kosmonavtın uçuşundan keçmiş 60 il ərzində elmdə baş verən yeniliklərdən, maraqlı fərziyyələrdən xəbərdar edir.

İnsan daim möcüzə axtarışındadır. Halbuki diqqət edəndə ən böyük möcüzələrin lap yaxında olduğunu anlayırsan. Elə buna görədir ki, "Elli" hər dəfə "Möcüzə" rubrikasında oxucularına insan vücudunu tanıdır. Bu dəfə isə jurnalda "ürək" adlı möcüzə barədə dürüst və ətraflı məlumat var.

"Elli"nin ənənəvi "İslam" rubrikası "Dostu necə seçərlər?" sualına cavab axtaranlar üçündür. Dinimiz bu axtarışda da bizə doğru yolu nişan verir.

May ayının ən maraqlı hadisələrindən biri demək olar ki, bütün yeniyetmələrin maraqla izlədikləri "Eurovision 2011" müsabiqəsidir. Yeni sayında "Elli" bu müsabiqə ilə bağlı azarkeşləri maraqlandıran bütün sualları cavablamağa çalışır. "İncəliklər" rubrikasında isə "ulduz" olmaq istəyənlər üçün dəyərli məsləhətlər var.

Jurnalın "İbrət var" adlı rubrikasında bu dəfə də maraqlı və ibrətamiz hekayə dərc olunub. "Dil bəlası" adlanan bu hekayə ağızdan çıxan hər kəlmənin əhəmiyyətini və dəyərini anladacaq.

"Elli"nin yeni sayında yenə də xeyli maraqlı informasiyalar, müsabiqələr, oyunlar var. "Məntiqlə düşün", "Orijinal foto", "Yumor hissin varmı?" müsabiqələri oxucularla jurnalın sıx ünsiyyətini təmin edir.

Bundan əlavə, 1 iyun - uşaqları beynəlxalq müdafiə günü münasibətilə "Elli"nin oxucularını gözəl bir sürpriz gözləyir. Sürprizin nədən ibarət olduğunu bilmək istəyən oxucuları jurnalı izləməyə dəvət edirik.