Dünyanın ən yaşlı milyarderi, isveçrəli Uolter Hefner vəfat edib. “Forbes”in milyarderlər reytinqində yer alan Kolter Hefner 101 yaşında İsveçrədə dünyasını dəyişib. Məlumatı “Bloomberg Businessweek” yayıb.

İş adamı iyunun 19-da vəfat etsə də, onun öldüyü yalnız indi məlum olub. O, həyatının son günlərinə qədər şirkətinin Sürixdəki ofisinə gedib-gəlib.

2012-ci ilin martına olan məlumata görə, Uolter Hefnerin sərvəti 4,3 milyard dollar olub. O, CA (əvvəllər Computer Associates) informasiya texnologiyaları şirkətinin ən iri səhmdarıdır. Bundan başqa, Hefner ailəsi “Automobil-und Motoren AG” avtomobil diller şəbəkəsinin sahibidir. Şirkət Volkswagen, Seat, Skoda və Audi avtomobillərinin İsveçrədəki ən iri idxalçısıdır.

Uolter Hefnerin ölümündən sonra dünyanın ən yaşlı milyarderi adı məşhur amerikalı maqnat Con Rokfellerin nəvəsi Devid Rokfellerə keçib. Onun 96 yaşı var.