Xarici hərbi qüvvələrin Əfqanıstandan tamamilə çıxarılmasından sonra bu ölkəyə maliyyə dəstəyi verməyi öz üzərinə götürən ölkələrin nümayəndələri Yaponiyada görüşüb. Konfransda çıxış edən Əfqanıstanın xarici işlər naziri Zalmay Rəsul ölkədə təhlükəsizliyə nəzarətin təhvil verilməsi prosesini tamamlamaqda qərarlı olduqlarını bildirib.

"Biz 2014-cü ilin sonunadək təhlükəsizliyin tamamilə əfqanlara təhvil verilməsində qərarlıyıq. Bu proses bütün qüvvəsi ilə davam edir və tezliklə əfqan təhlükəsizlik qüvvələri Əfqanıstan əhalisinin 75 faizinin təhlükəsizliyini təmin edən əsas qüvvəyə çevriləcək. Keçid prosesini başa çatdırmaq bizim dünya ictimaiyyəti ilə müttəfiqliyimizin ən mühüm məqsədidir", - deyə Zalmay Rəsul bildirib.

70-ə yaxın ölkə və beynəlxalq təşkilatın nümayəndələrinin iştirak etdiyi donorlar konfransda yaxın 4 il ərzində Əfqanıstana 16 milyard dollar yardım etmək razılaşdırılıb. Təkcə Yaponiya bu il Əfqanıstana 3 milyard dollar, ABŞ isə 2,3 milyard dollar maliyyə dəstəyi göstərəcək.

"Amerika Birləşmiş Ştatları öz Konqresindən Əfqanıstana 2017-ci ilədək yardım edilməsini istəyəcək. Bizim dəstəyimiz əfqan hökumətinə qarşılıqlı olaraq razılaşdırılmış məqsədlərin gerçəkləşdirilməsində kömək etmək üçün imkanlar yaradacaq", - deyə ABŞ dövlət katibi Hillari Klinton vurğulayıb.

İranın xarici işlər naziri Əli Əkbər Salehi isə xarici hərbi qüvvələrin Əfqanıstanda mövcudluğunun heç də bu ölkəyə fayda vermədiyini deyib: "Ümid edirik ki, Əfqanıstanda xarici hərbi qüvvələrin mövcud olduğu 10 il kimi uzun bir müddətin sona çatması və ölkədəki xarici bazaların bağlanması ilə ölkədə sülh və sabitlik bərqərar olacaq. Təəssüf ki, xarici hərbi qüvvələrin Əfqanıstanda mövcudluğu ölkədə terrorun güclənməsinə, narkotik maddə istehsalı və alverinin artmasına səbəb olub".

Qeyd edək ki, dünya ictimaiyyəti 2002-ci ildən bəri Əfqanıstana 60 milyard dollar məbləğində humanitar yardım göstərib.