Taksim aksiyalarına dəstək verən “Anti-kapitalist müsəlmanlar” dünən axşam meydanda “Merac” gecəsini qeyd ediblər. Tədbir iştirakçıları Qurandan Yasin və digər surələri oxuyublar. Daha sonra aksiyaçılara bu gecəyə aid “Kandil simiti” paylanıb və onlar üçün dua edilib.

“Doğan” agentliyinin (DHA) məlumatına görə, 9 gündür davam edən aksiyada etirazçılar hər gün alkoqollu içki qəbul etsələr də, dünən “Merac” gecəsi səbəbindən içki içilməyib. Bunun əvəzinə aksiyaçılara bu gecəyə məxsus şirniyyat və qidalar paylanıb.

Qeyd edək ki, İstanbuldan başqa aksiyalarda “Merac” gecəsinin qeyd edilməsi hadisəsi Kocaeli, Sivas şəhərlərində və Muğla şəhərinin Bodrum rayonunda da baş tutub. Məlumata görə, aksiyalarda gecəyə məxsus şirniyyat və yeməkdən polislərə də verilib.