Dağıstanda dəmir yolunun Kizlyar yaşayış məntəqəsində partlayış baş verib. Hadisə sərnişin qatarının keçməsindən sonra baş verdiyinə görə heç kim xəsarət almayıb. Gecə saat 03.00 radələrində Həştərxan-Mahaçqala sərnişin qatarı keçəndən sonra baş verən partlayışdan sonra silahlılar dəmiryolunun mühafizəsini həyata keçirən hərbçiləri atəşə tutublar. Rusiya kütləvi informasiya vasitələrinin yaydığı məlumata görə, atışmada hərbçilərdən biri yaralanıb. 20 dəqiqə çəkən atışmadan sonra hadisəni törədənlər qaçaraq gizlənə biliblər.

Dəmiryolunun üç metrlik hissəsi sıradan çıxıb. Həmin ərazidə qatarların hərəkəti dayandırılıb. Moskva-Mahaçqala sərnişin və yük qatarının hərəkəti dayanıb. Hazırda dəmir yolunda bərpa işləri aparılır.

“Azərbaycan Dəmir Yolları” Qapalı Səhmdar Cəmiyyətinin mətbuat katibliyinin rəhbəri Nadir Əzməmmədov ANS-ə açıqlamasında bildirib ki, Azərbaycana gələn qatarın hərəkət qrafikində gecikmə olmayıb və o, vaxtında Bakıya çatıb. Eyni zamanda, həmin xətlə hərəkət edən qatarların heç bir qrafiki pozulmayıb.