Dağıstanın paytaxtı Mahaçkaladan 15 km məsafədə yerləşən Korkmasqala rayonunda anti-terror əməliyyatlarına başlanılıb. Rusiya telekanalları Federal Təhlükəsizlik Xidmətinin Dağıstan üzrə İdarəsinə istinadən xəbər verir ki, atışmada xidmətin iki xüsusi təyinatlısı yüngül yaralanıb. Silahlılar isə təslim olmaq tələbinə atəşlə cavab veriblər. Bundan sonra qonşu evlərin sakinləri evakuasiya olunub, bu gün səhər yaralıların sığındığı evə hücum başlayıb.

Rusiya kütləvi informasiya vasitələrinin yaydığı məlumata görə, öldürülən yaraqlılar federal və beynəlxalq axtarışda olan Maqomedali Vahabovun qrupuna daxildir. Rusiya Prokurorluğu yanında Təhqiqat Komitəsinin Dağıstan nümayəndəliyi zərərsizləşdirilən iki silahlının ötən gün törədilən partlayışla əlaqəli olmasını istisna etməyib.

Məlumatda o da bildirilir ki, hadisə yerindən ötən gün partlayışda əli olduğu güman olunan silahlının olduğu "niva" markalı maşına məxsus qeydiyyat nişanları tapılıb.

Xatırladaq ki, ötən gün Rusiyanın Şimali Qafqaz regionunda 2010-cu ilin ilk qanlı terror aktı törədilib. Mahaçqalada baş vermiş partlayış nəticəsində 7 milis əməkdaşi ölüb, 14 nəfər yaralanıb. ANSPRESS