Amerika Birləşmiş Ştatlarında keçmiş prezdentliyə namizəd, respublikaçı senator Con Makkeyn Gürcüstanda səfərdədir.

Gürcüstanın yerli telekanallarının məlumatına görə, Makkeyni senator həmkarları- Con Barosso və Con Tunla müşayiət edir. Senatorlar Batumi və Zuqdidi şəhərlərində bir sıra görüşlər keçirib. Gürcüstan Xarici İşlər Nazirliyindən verilən məlumata görə, senatorların ölkəyə səfərlərinin əsas məqsədi hər iki dövlət arasında strateji əməkdaşlığı gücləndirmək və Gürcüstanın ərazi bütövlüyünə dəstək verməkdir.

Batumidə amerikalı senator müxalifət nümayəndələri ilə görüşüb. O, müxalifət nümayəndəsi Georoqi Tarqamadze ilə də danışıqlar aparıb. Əsas müzakirə obyekti Gürcüstan üçün mövcud xarici təhlükələr olub. Danışıqlarda həmçinin Rusiya-Gürcüstan münasibətlərinə də toxunulub. Bundan başqa, tərəflər arasında ölkənin gələcək planları, iqtisadi vəziyyəti və işsizlik məsələləri də ətraflı müzakirə edilib.

Gürcüstan prezidenti Mixail Saakaşvili isə senator Con Makkeynə Gürcüstanın "Milli Qəhrəmanı" adını verib. Bundan başqa, ona Vyetnam müharibəsi dövründə əsir düşmüş Amerika əsgərindən rus generalı tərəfindən alınan və 2008-ci ilin avqustunda gücrü biznesmeninə satılan odlu silah hədiyyə edilib. Saakaşvili bu silahın "soyuq müharibənin" simvolu olduğunu bildirib. ANSPRESS