Çinin cənub və şərq əyalətlərində leysan yağışların səbəb olduğu daşqınlar nəticəsində 15 nəfər ölüb. Mərkəzi Çinin Hunan əyalətində isə daşqınla əlaqədar 5000-ə yaxın adam evakuasiya edilib. "Sinxua" agentliyinin məlumatına görə, təbii fəlakətdən 173 yaşayış məntəqəsində ümumilikdə 310 minə yaxın adam zərər çəkib.

Daşqın infrastruktura və elektrik enerjisi təchizatına da ziyan vurub. Ən çox ziyan isə Hunan əyalətinin Xuayxua şəhərinə dəyib. Burada son sutka ərzində düşən yağıntının səviyyəsi 250 millimetri ötüb.

Bu arada, sinoptiklər növbəti tropik qasırğanın yaxınlaşdığını proqnozlaşdırırlar. Proqnozlara görə, "Rumbiya" qasırğası daşqından zərər çəkən cənub əyalətlərindən keçəcək. "Rumbiya" ilin əvvəllərindən Çindən keçən 6-cı tropik qasırğa olacaq.