Research in Motion şirkəti BlackBerry PlayBook planşet kompüterləri üçün PlayBook OS əməliyyat sisteminin yeni versiyasını buraxıb.

PlayBook OS 2.0 yenilənmə şəkilində bütün planşet sahiblərinə pulsuz göndəriləcək.
Yeni versiyanın tərkibinə əməliyyat sisteminin birinci versiyasında olmayan elektron poçtla iş üçün nəzərdə tutulan proqram daxil edilib, eyni zamanda BlackBerry Bridge alətinin imkanları genişləndirilib. Belə ki, sistemin birinci versiyasında o planşet ekranında BlackBerry smartfonundakı kontentinin göstərilməsinə xidmət edib. İndi Bridge-in vasitəsilə smartfondan planşeti idarə etmək üçün pult kimi istifadə etmək olar.

Bundan başqa, RIM şirkəti PlayBook OS-da quraşdırılan brauzer və ekran klaviaturasını yeniləyib, eləcə də sistemdə Print To Go proqramı yer alıb və korporativ istifadəçilər üçün bir neçə alət işə salınıb, Lenta yazır.

Əməliyyat sisteminin yeni versiyasının işıq üzü görməsi ilə eyni vaxtda şirkət hələlik yalnız ABŞ ərazisində istifadəsi mümkün olan film və teleproqramların yer aldığı Video Store mağazasını istifadəyə verib.

Qeyd edək ki, PlayBook planşet kompüteri satışa 2011-ci ilin aprelində çıxarılıb. Əvvəlcə qurğunun kiçik modelinin qiyməti 499 dollar olub, lakin satış həcminin aşağı olması səbəbindən istehsalçı noyabrda onun qiymətini 199 dollaradək azaltmağa məcbur olub.