Bəzi ölkələr sonradan Suriyanı günahlandırmaq üçün BMT-nin xüsusi nümayəndəsi Kofi Annanın planının iflasına çalışır. ANS PRESS-in İTAR-TASS-a istinadən verdiyi məlumata görə, bunu Suriya prezidenti Bəşər Əsəd İran televiziyasına müsahibəsində deyib.

Bəşər Əsəd bəyan edib ki, ölkəsinə qarşı hərbi əməliyyatı gözləmir. “Liviya ssenarisi Suriyada keçməyəcək”, - Suriya prezidenti deyib. Onun sözlərinə görə, minlərlə insanların xilası üçün terrorçuların məhvi Suriya hökumətinin mənəvi borcudur.

“Suriyanı əzmək səyləri indiyədək nəticə verməyib və bundan sonra da verməyəcək”, - deyən Bəşər Əsədin sözlərinə görə, suriyalılar Fələstinə verdikləri dəstəyə görə təzyiqə məruz qalıblar.

“Biz islahatlar keçiririk. Lakin onlar terrorçular və onlara kömək edən hökumətlər üçün heç bir əhəmiyyət kəsb etmir”, - Bəşər Əsəd bildirib.