Rusiya Xarici İşlər Nazirliyi Simferopoldakı baş konsulluğuna "Berkut" döyüşçülərinə Rusiya vətəndaşlığı verilməsi barədə tapşırıq verib.

ANS PRESS-in xəbərinə görə, Rusiya Xarici İşlər Nazirliyi Krım Muxtar Respublikasının paytaxtı Simferopoldakı Baş konsulluğuna Ukraynanın çevik polis alayı "Berkut"-un üzvlərinə Rusiya vətəndaşlığı verilməsini tələb edib.

"Simferepolda olan Rusiya Baş konsulluğuna "Berkut" döyüşçülərinə Rusiya vətəndaşlığı verilməsi üçün təcili tədbirlərin görülməsi tapşırıldı." - deyə Rusiya XİN-in "Facebook" səhifəsində məlumat yayımlanıb.

Rusiya Daxili İşlər Nazirliyi isə verdiyi açıqlamada Ukraynadan gələcək "Berkut" əməkdaşlarına öz təhlükəsizlik orqanlarında vəzifə verməyə hazır olduqlarını bildirib.

Qeyd edək ki, fevralın 25-də Ukraynanın müvəqqəti hökumətində Daxili işlər naziri vəzifəsini yerinə yetirən Arsen Avakov nümayişlərin dağıdılmasında iştirak edən "Berkut" xüsusi polis alayının vəzifəsinə son qoymuşdu.