Minskdə Dövlət Təhlükəsizlik Komitəsinin (DTK) istintaq təcridxanasından prezidentliyə keçmiş namizəd Vladimir Neklyayev və jurnalist, prezidentliyə keçmiş namizəd Andrey Sannikovun həyat yoldaşı İrina Xalip, eləcə də, dekabrın 19-da keçirilmiş prezident seçkilərindən sonrakı kütləvi iğtişaşlara görə həbs edilmiş bir neçə nəfər azadlığa buraxılıb. Onlar barəsində həbs - qətimkan tədbiri ev dustaqlığı ilə əvəz edilib. Bu barədə məlumatı Belarus DTK-nın informasiya və idtimaiyyətlə əlaqələr mərkəzi yayıb. Məlumatda deyilir ki, həmin şəxslərin davranışları nəzərə alınıb və azadlığa buraxılmaları barədə qərar prokurorluqla məsləhətləşmələr əsasında qəbul edilib.

Bir gün əvvəl isə “Xartiya-97” müxalifət saytının redaktoru Natalya Radina azadlığa buraxılmışdı. Hazırda DTK-nın istintaq təcridxaansında 30-yaxın müxalifətçi, o cümlədən, prezidentliyə keçmiş namizədlər - Anrdey Sannikov, Oles Mixaleviç və Nikolay Statkeviç saxlanılırlar.

Müşahidəsilər hesab edirlər ki, Belarus hakimiyyətinin Avropa Birliyi Şurasının toplantısı ərəfəsində atdığı addımlar təsadüfi deyil. Yanvarın 31-də keçiriləcək toplantıda Belarusa qarşı sanksiyalar məsələsi müzakirə edilməlidir. ANSPRESS