Avropa Komissiyası Aİ-yə namizəd ölkələrin üzvlük prosesi başa çatmadan Komissiyanın işində daha fəal iştirakını nəzərdə tutan yeni genişlənmə strategiyası üzərində işləyir. Anadolu Agentliyinin Brüsseldən layihə sənədlərinə istinadən verdiyi məlumata görə, Komissiyanın sədri Ursula fon der Lyayenin bu strategiyanı oktyabrın 6-da başlayacaq Qərbi Balkan səfəri zamanı açıqlaması gözlənilir.
Təklifə əsasən, namizəd ölkə üzvlük müqaviləsini imzaladıqdan sonra, lakin bütün 27 üzv dövlət sənədi milli səviyyədə ratifikasiya etməmişdən əvvəl Komissiyaya nümayəndə göndərərək müvafiq qərar qəbulu proseslərində iştirak edə biləcək. Bu nümayəndə Komissiyanın muxtariyyəti və kollektiv məsuliyyət prinsipi qorunmaq şərtilə Aİ qanunvericiliyinin formalaşmasına töhfə verə biləcək.
Bundan əlavə, Komissiya üzvlük danışıqlarının rəsmi şəkildə başa çatmasından sonra namizəd ölkələrə Aİ Şurasının iclaslarında müşahidəçi statusu verilməsi məsələsini nəzərdən keçirir. Bu, həmin ölkələrə Birliyin ən yüksək siyasi qərar qəbuletmə orqanının işində iştirak imkanı yaradacaq.
Strategiyanın məqsədi namizəd ölkələrin zəruri daxili islahatları həyata keçirdikcə vahid bazara “tədricən və daha əhatəli inteqrasiyasını” təmin etməkdir. Anadolu Agentliyi bu addımın ilk növbədə Monteneqro və Albaniya kimi üzvlük danışıqlarında irəliləmiş ölkələrə şamil oluna biləcəyini yazır.
Layihə sənədlərində üzvlük müqaviləsinin milli parlamentlər tərəfindən ratifikasiyasının illərlə çəkə biləcəyinə diqqət çəkilir və məhz bu keçid dövründə namizəd ölkələrin daha geniş iştirakının nəzərdən keçirilməsinin zəruri olduğu vurğulanır. Hazırkı qaydalara görə, namizəd ölkə danışıqları tamamlasa belə, bütün üzv dövlətlərin təsdiqi başa çatanadək Birliyin qərar qəbuletmə orqanlarında təmsil olunmur.
Komissiyaya göndəriləcək nümayəndənin yalnız aidiyyəti mövzular üzrə iclaslara qatılacağı və Komissiyanın müstəqilliyinin tam qorunacağı bildirilir. Təklif qüvvəyə minərsə, bu, Aİ-nin genişlənmə tarixində namizəd ölkələrə rəsmi üzvlükdən əvvəl institusional iştirak imkanı verən ilk mexanizmlərdən biri olacaq.
Strategiyanın yekun mətni Komissiya tərəfindən rəsmi açıqlanmayıb; məlumat layihə sənədlərinə əsaslanır və son variant dəyişdirilə bilər.
Mənbə: Anadolu Agentliyi
Şərhlər