Pentaqon Əfqanıstandakı xüsusi təyinatlılarının sayını iki dəfə artırıb. Bu barədə “Los Angeles Times” nəşri məlumat yayıb. Pentaqondakı mənbənin bildirdiyinə görə, təcrübə göstərir ki, Taliban hərəkatının yaraqlıları ilə xüsusi təyinatlıların mübarizəsi daha effektivdir. Xüsusi təyinatlıların daha yaxşı nəticə göstərməsinin səbəbi isə onların daha peşəkar səviyyədə hazırlanması və xüsusi tələblər əsasında seçilməsi ilə bağlıdır.

Tələblər sırasına əsgərin olduğu ölkənin dilini bilməsi, xarici görkəmini milli ənənələrə uyğunlaşdıra bilmək qabiliyyəti daxildir. Bundan əlavə Əfqanıstandakı Amerika xüsusi təyinatlılarından saqqal və müəyyən uzunluqda saç saxlamaq, yerli əhali ilə etibarlı münasibət qurmaq tələb olunur.

Əfqanıstada nə qədər Amerika xüsusi təyinatlısının olması məxfi məlumat hesab edildiyindən onların sayı açıqlanmasa da, kontingentin iki dəfə artırıldığı bildirilib. Onların sayının artırılması barədə qərar prezident Obamanın 2011-ci ilin iyul ayında Əfqanıstanı tərk etməzdən öncə burda aparılmış əməliyyatların effektivliyinin artırılması ilə bağlı fikirlərindən sonra qəbul edilib. ANSPRESS