İslandiyanın Qrimsvotn vulkanının püskürməsi nəticəsində yaranmış vulkanik külün səbəb olduğu dumanla əlaqədar ötən gün Avropa hava limanlarında 500-ə qədər aviareys təxirə salınıb. Böyük Britaniyanın nəhəng aviaşirkəti “Britiş Airways” Şotlandiyanın Edinburq, Qlazqo, Aberdin kimi şəhərlərinin hava limanlarından reysləri təxirə salıb.

Hitrou daxil olmaqla, London hava limanları hələlik normal rejimdə faəliyyət göstərir.

Qeyd edək ki, İslandiyadan gələn vulkanik bulud Danimarka, Norveç və İsveç istiqamətində hərəkət edir. Vulkanik buludların həmin ölkələrə çatacağı gözlənilir. Bundan savayı buludlar həmçinin Almaniyaya doğru hərəkət edir ki, bu ölkəyə çatacağı təqdirdə bu gün gecə Hamburq, Bremen və hətta Berlin hava limanlarının bağlanacağı gözlənilir.