Rabitə və İnformasiya Texnologiyaları Nazirliyi Bakı Telefon Rabitəsi İstehsalat Birliyinin (BTRİB) CDMA abunəçilərinin sayı 8520-yə çatıb. Məlumat üçün bildirək ki, bu rabitə sistemi 1993-cü ildə Amerika Telekommunikasiya Sənayesi Assosiasiyasında İS-95 standartına uyğun olaraq standartlaşdırılıb. Hazırda bu ən müasir mobil telefon sistemi hesab olunur. CDMA texnologiyası İTU tərəfindən 3-cü nəsil mobil rabitə sisteminin hazırlanması üçün əsas kimi tövsiyyə olunub.

“Aztelekom” İB-də CDMA simsiz rabitə xidməti 2005-ci ilin sentyabr ayında istismara verilib, əhatə dairəsi Bakı, Abşeron və Şamaxı rayonu olub. Qısa müddətdə bu xidmətin regionlarda tətbiqi istiqamətində tədbirlər görülüb və hazırda “Aztelekom” İB-nin 32 baza stansiyasından ibarət CDMA simsiz rabitə xidməti respublikanın 20 rayon ərazisində təşkil olunub. Yaxın gələcəkdə respublikanın digər bölgələrində də CDMA simsiz rabitə xidməti təşkil ediləcək.

BTRİB-in rəsmisindən aldığımız məlumata əsasən, birliyin bazasında 13 min CDMA nömrəsi var və ehtiyac yarandıqda, onların sayı artırılacaq. BTRİB 511 indeksasiyası ilə CDMA xidmətləri göstərir. “Aztelekom” İB ilə BTRİB-in CDMA abunəçiləri ölkənin istənilən regionunda öz telefonundan istifadə edə bilər.

Qeyd edək ki, Azərbaycanda CDMA şəbəkə xidmətlərini “Baktelekom”, “Aztelekom” dövlət müəssisələri, eləcə də “Catel”, “Ultel” və “Aztrank” təqdim edir. ANSPRESS