Rabitə və İnformasiya Texnologiyaları Nazirliyinin (RITN) Bakı Telefon Rabitəsi İstehsalat Birliyi (BTRİB) bu gündən etibarən 74 saylı analoq avtomat telefon stansiyasının (ATS) abunəçilərini NGN tipli elektron ATS-ə keçirilməsi üzrə işlərə başlayır.

Nazirlikdən ANS PRESS-ə verilən məlumata görə, abunəçilərin elektron ATS-ə keçirilməsindən sonra telefon nömrələrinin prefiksi 374 olacaq.

Rekonstruksiya işlərinin başlaması ilə bağlı BTRİB sözügedən ATS-in abunəçilərinin telefon xətlərinin işində qısamüddətli fasilələr ola biləcəyini bildirir.

Qeyd edək ki, paytaxtın Nizami rayon Telekommunikasiya Qovşağının bir sıra ATS-lərinin, o cümlədən 74 saylı ATS-də, rekonstruksiyası üzrə işlər bu ilin dekabr ayında başa çatdırılıb. ANSPRESS