“İşdən çıxarılmağım haqqında yayılan məlumatlar həqiqəti əks etdirmir. Mən bu dəqiqə işimin başındayam. Sadəcə, təhqiqat gedir”.

Bu sözləri Aktual.az-a Göyçay rayon yol polisi şöbəsinin rəisi Elman Əliyev rüşvət alması iddiaları ilə bağlı yayılan videogörüntüyə münasibət bildirirkən deyib.

Onun sözlərinə görə, videogörüntüdə hər hansı bir cinayət əməli təsbit olunsaydı, həbs olunardı:

“Amma gördüyünüz kimi mən azadlıqdayam. Yenə deyirəm, rüşvət alsaydım, məni həbs edərdilər. Onu da demək istəyirəm ki, bu məsələ ilə bağlı araşdırma aparılır”.

Qeyd edək ki, Göyçay rayon yol polisi şöbəsi rəisinin rüşvət alması iddiaları ilə bağlı yayılan videogörüntü səbəbindən Daxili İşlər Nazirliyinin daxili təhqiqat idarəsinin Göyçay rayon Polis İdarəsində yoxlamalar aparılır.

Daxili İşlər Nazirliyinin mətbuat xidmətinin rəhbəri, polis-polkovniki Sadiq Gözəlovun ANS PRESS-ə verdiyi məlumata görə, Göyçay rayon polis şöbəsinin Dövlət Yol Polisi bölməsində Nazirliyin aidiyyəti idarələri tərəfindən aparılan xidməti təhqiqat başa çatıb və yekun rəy DİN rəhbərliyinə təqdim edilib.

“Həmin sənəd əsasında Daxili İşlər naziri cənab Ramil Usubov müvafiq əmr imzalayıb. Əmrə əsasən, bölmənin rəisi Elman Əliyev korrupsiya hüquqpozmalarına yol verməklə tapşırılan sahənin işini təmin etmədiyinə, eyni zamanda, daxili işlər orqanları əməkdaşı adına və polis nüfuzuna xələl gətirdiyi hərəkətlərə görə daxili işlər orqanlarında xidmətdən xaric edilib”, - deyə Sadiq Gözəlov vurğulayıb.

Hazırda həmin hadisə ilə bağlı araşdırmalar davam edir. Digər günahkar şəxslər cəzalandırılacaqlar.

Qeyd edək ki, sosial şəbəkələrdə və “YouTube” video portalında yol polisinin açıq-aşkar rüşvət alması barədə video paylaşılmışdı.

ANS PRESS həmin məsələni qabardaraq, bu barədə hüquq-mühafizə orqanlarına məlumat vermişdi.