Azərbaycanda istehlakçılara verilən qazın qiymətinin artırılması nəzərdə tutulmur. Bu barədə "Azəriqaz" İstehsalat Birliyinin sədri Əkbər Hacıyev bildirib. Onun sözlərinə görə, qazın qiymətinin artırılması ilə bağlı Tarif Şurasına müraciət edilməyib: "Qazın qiymətinin qaldırılması nəzərdə tutulmayıb".

Xatırladaq ki, Azərbaycanda qazın qiymət artımı sonuncu dəfə 2009-cu il iyunun 30-da baş verib. Həmin vaxt əhaliyə satılan qazın hər 1000 kubmetrinin qiyməti 47,2 manatdan 100,0 manata qaldırılıb.