APA-nın məlumatına görə, Amerikanın nüfuzlu “The Wall Street Journal” qəzeti bu başlıqla məqalə dərc edib.

Məqalə müəllifi Alessandro Torello yazır ki, Rusiyadan qaz asılılığını azaltmaq arzusunda olan Avropa İttifaqı üçün Azərbaycanın mövqeyi bu mənada çox mühüm olacaq. “İlin sonuna kimi Azərbaycanın “Şahdəniz 2” yatağından hasil ediləcək qaz üçün uzun müddətli alıcıları seçəcəyi gözlənilir. Burada təqribən bir trillyon kub metrdən çox təbii qaz var”, - deyə məqalədə qeyd olunur.

Nəşr yazır ki, bu ilin iyun ayında Azərbaycan prezidenti İlham Əliyev qazın Avropaya istiqamət götürəcəyini təstiq edib, amma bunun konkret marşrutunu açıqlamayıb.

ARDNŞ-in vitse-prezidenti Elşad Nəsirova istinad edən qəzet bildirir ki, Azərbaycan gələcəkdə nəql qabiliyəti genişlənidirilə biləcək orta tutumlu boru xəttinə üstünlük verir: “Azərbaycan iri həcmli boru layihəsinə soyuq yanaşır. ARDNŞ mümkün qədər çox avropalı müştəri əldə etmək və bunun müqabilində yaxşı vəsait qazanmaq niyyətindədir”.

“The Wall Street Journal” yazır ki, regionun təbii qazla digər zəngin dövləti Türkmənistandır. Lakin Ruisya və İranın müxalif mövqeyi səbəbindən bu ölkənin Avropa önündə öhdəlik götürəcəyi inandırıcı deyil. Nəşrin qənaətinə görə, məhz bu səbəbdən “Nabucco” üçün Azərbaycanın tutacağı mövqe həlledici olacaq.