Prezident İlham Əliyev məcburi köçkün ailələrinin mənzil-məişət şəraitinin yaxşılaşdırılmasına dair əlavə tədbirlər haqqında sərəncam imzalayıb. Sərəncama əsasən məcburi köçkün ailələrinin mənzil-məişət şəraitinin yaxşılaşdırılması məqsədilə yeni çoxmərtəbəli yaşayış binalarının layihələndirilməsi və tikintiyə başlanması üçün 2009-cu il dövlət büdcəsində nəzərdə tutulmuş Prezidentin Ehtiyat Fondundan Qaçqınların və Məcburi Köçkünlərin İşləri üzrə Dövlət Komitəsinə 3 milyon manat məbləğində vəsait ayrılıb.

Dövlət Neft Fonduna tapşırılıb ki, 2010-cu il Dövlət Neft Fondunun büdcəsi layihəsində bu sərəncamın 1-ci bəndində nəzərdə tutulan işlərin davam etdirilməsi üçün müvafiq məbləğdə vəsait nəzərdə tutsun.

Nazirlər Kabinetinə isə sərəncamdan irəli gələn digər məsələləri həll etmək tapşırığı verilib.