Azərbaycan Milli Elmlər Akademiyasının (AMEA) Şəki Regional Elmi Mərkəzi elmi şurasının növbəti iclası keçirilib.

Akademiyadan bildiriblər ki, tədbirdə mərkəzin direktoru, geologiya-mineralogiya üzrə elmlər doktoru Zəkəriyyə Əlizadə gündəlikdə duran məsələlər barədə məlumat verib.

Z.Əlizadə elmi-tədqiqat müəssisəsində hazırlanmaqda olan “İpəkçilik ensiklopediyası” üçün nəzərdə tutulan materialların işlənilməsi və nəşrə hazırlıq vəziyyətindən söhbət açıb. O, “İpəkçilik lüğəti” kitabı kimi çapı düşünülən nəşrin AMEA-nın vitse-prezidenti, akademik İsa Həbibbəylinin təşəbbüsü ilə “İpəkçilik ensiklopediyası” şəklində hazırlanmasına qərar verildiyini bildirib.

Son vaxtlara qədər Azərbaycanın əsas ipəkçilik regionlarından olan Şəki-Zaqatala və Şamaxı ipəkçiliyinin bütün dünya miqyasında tanındığını söyləyən Z.Əlizadə ensiklopediyada bu istiqamətdə mühüm məlumatların toplandığını nəzərə çatdırıb.

İclasda çıxış edənlər ensiklopediya ilə bağlı fikirlərini bildiriblər.