“Bu yaxınlarda biz Bakıdan iki yüz kilometr məsafədə iri beynəlxalq dağ xizək kurortunun tikintisinə başlamışıq. Şaquli kanat yollarının, mehmanxanaların tikintisinə də start verilib”. Prezident İlham Əliyev “Vesti” telekanalına müsahibəsində belə deyib.

Onun sözlərinə görə, Azərbaycanda dağ xizək idmanını bir il, il yarımdan sonra inkişaf etdirmək mümkün olacaq.
“Lakin bizim əsas ümidlərimiz, əlbəttə, yay oyunları ilə bağlıdır. Son Olimpiya oyunlarında biz yaxşı çıxış etdik, yeddi medal qazandıq. 2009-cu ildə də bir neçə idmançımız dünya və Avropa çempionu olublar. Bizim şahmatçılardan ibarət komandamız Avropa çempionatında birinci yeri tutdu. Bu ciddi nailiyyətdir xüsusən ona görə ki, bizim şahmatçıların hamısı gənclərdir. Mən onlarla görüşəndə demişdim ki, siz hamınız müstəqillik şəraitində formalaşmısınız”-deyə İlham Əliyev vurğulayıb.

İlham Əliyev 1997-ci ildən Azərbaycan Milli Olimpiya Komitəsinin prezidenti olaraq ölkəmizdə idmana dəstək olduğunu bildirib. ANSPRESS